Abraham vertel die verhaal van Abraham (Dann-Jacques Mouton), ‘n kunstenaar en dromer van Kannaland in die vroeë 1980’s. Ilza Roggeband het met vier van die mees prominente akteurs in die rolprent gesels.
Hannes Müller
Jy speel die rol van Jong Jans. Wat was die grootste uitdaging van die rol?
My grootste uitdaging was om gestalte te gee aan so ‘n legende, om oom Jans uit te beeld, maar hom ook my eie te maak.
Hoe het jy Jans Rautenbach as regisseur ervaar?
Jans as regisseur is ‘n eens-in-‘n-leeftyd-ervaring. Hy werk op ‘n heel ander vlak as enige regisseur waarmee ek al gewerk het. Sy visie is besonders sterk en hy kommunikeer met sy akteurs met ‘n emosionele woordeskat wat raar in ons bedryf is.
Wat is die een ding wat jy altyd sal onthou van jou tyd op stel?
Ons het die voorreg gehad om vir agt weke ‘n geslote stel te hê met die gevolg dat almal totaal op die film kon fokus. Dit het soos een groot familie gevoel en die mense van die omgewing het ons ingeneem en deel van hulle gemeenskap gemaak.
Wie sal Abraham geniet?
Dis nie ‘n popcorn-fliek nie. Ek dink dis vir ‘n ouer, uitgelese gehoor.
Wat maak hierdie film anders as ander Afrikaanse flieks?
Daar is lanklaas ‘n film met soveel ervaring en vernuf gemaak. Ons het ook die luukse van tyd gehad en daar was met ander woorde geen kompromie nie. Die emosionele impak van die film is uniek.
Dann-Jacques Mouton en Hannes Müller
Franci Swanepoel
Jy speel die rol van Almeri. Wat was die grootste uitdaging van die rol?
Dis ‘n groot uitdaging om ‘n formidabele mens en vrou soos Almeri te vertolk. Sy is ‘n lieflike mens en ek dink haar toewyding is ‘n storie op sy eie.
Hoe het jy Jans Rautenbach as regisseur ervaar?
Oom Jans is die regisseur wat my die meeste ooit geleer het. Hy het ‘n oog, hy het ‘n gevoel en hy het ‘n hart.
Wat is die een ding wat jy altyd sal onthou van jou tyd op stel?
Ek sal altyd die lekker tye saam met DJ, Hannes en Jill Levenburg (sy speel die rol van Beulah) onthou. Ons het ‘n baie hegte vriendskap gesmee.
Wie sal die film geniet?
Enigiemand wat ‘n hart het en wat ‘n kunswerk van die meester van Afrikaanse films wil sien sal dit geniet. Die storie van Abraham is hartroerend en aangrypend.
Wat maak hierdie film anders as ander Afrikaanse flieks?
Ek dink die film is ‘n juweel. Dis oom Jans se eie storie, daar is geen pretensie nie. Die spel van DJ Mouton is uitmuntend. Oom Jans werk nog op die “outydse” manier en dit wys dat die hart van ‘n film draai om die storie wat vertel word.
Franci Swanepoel
Dann-Jacques Mouton
Jy speel die rol van Abraham. Wat was die grootste uitdaging van die rol?
My grootste uitdaging was om ‘n eerlike vertolking te gee. Om dit te kan doen, was dit belangrik om die karakter te verstaan in die landskap waar hy homself bevind het.
Hoe het jy Jans Rautenbach as regisseur ervaar?
As ek nou daaraan dink, was ek baie intimidated om te begin, maar sodra ek sy process begin verstaan het, was dit net ‘n kwessie van om hom te vertrou. Ek het meer van spel op film geleer in die tyd toe ons Abraham geskiet het.
Wat is die een ding wat jy altyd sal onthou van jou tyd op stel?
Die een ding wat ek onthou en saam met my dra, was die support van die crew en my medespelers. Ook die passie en liefde waarmee ons Abraham geskiet het. Niemand was groter as die projek nie. Almal het bygedra om Abraham se storie te vertel – crew, wardrobe, extras, spelers, DOP, regisseur…
Wie sal die film geniet?
Ek dink enige mense wat drome het en dit wil bereik sal die film waardeer en geniet. Dis ‘n menslike storie. Die hele Suid-Afrika en selfs internationals sal dit geniet.
Wat maak hierdie film anders as ander Afrikaanse films?
Net om te dink dat natural beligting gebruik is, set dit Abraham apart van ander Afrikaanse flieks in Suid-Afrika.
Chantell de Villiers Phillipus
Jy speel die rol van Katie. Wat was die grootste uitdaging van die rol?
Ek dink my grootste uitdaging was dat Katie ‘n spirits-drinker was. Ek moes my inleef en my bring in daai wêreld waar ek nog nie was nie.
Hoe het jy Jans Rautenbach as regisseur ervaar?
Wat ‘n wonderlike ervaring en goeie mentor! Dit was vir my so ‘n groot eer om met oom Jans te werk; die manier van hoe hy met mens werk was so anders en om net die beste uit jouself te bring.
Wat is die een ding wat jy altyd sal onthou van jou tyd op die stel?
Ek kan nie eintlik ‘n uitsondering maak nie want daar is so baie oomblikke wat onvergeetlik was. Dit was lekker om met DJ Mouton en ons kind in die film, Ashlene, te werk. Om haar heeltyd op stel te hê was ook baie lekker.
Wie sal die film geniet?
Ek dink dis ‘n storie vir almal want ek glo ons almal droom graag en wil ons drome bereik.
Wat maak hierdie film anders as ander Afrikaanse flieks?
Dis ‘n eg Afrikaanse storie en baie van die akteurs in die hierdie film is rou uit die aarde en dit maak dit meer interessant.
Abraham word landwyd op 16 Oktober vrygestel.
Foto's verskaf
The post Onderhoude oor Abraham: Eerste rolprent van Jans Rautenbach in 30 jaar appeared first on LitNet.