Foto: Robert Hamblin
Januarie is vir meeste mense ’n lang een of, soos my vriendin sê, “meer maand as geld” en om lekker te lag, is gewis ’n lekker stres-ontlaaier. En wie beter as Dowwe Dolla om die jaar in te lui?
Dowwe Dolla is terug met ’n nuwe vertoning, #dowwedolla, want sy glo alles word deesdae “ge-hashtag”. As sy die onsekerheid op die gehoor se gesigte sien, probeer sy om Twitter aan die gehoor te verduidelik, maar gee halfpad op en verduidelik aan haar “dowe nefie, Kotie” wat glo die ligte doen, dat dit te veel vir haar brein is. Sy hou egter nie op om deurgaans alles te “hashtag” nie.
In hierdie nuwe eenvrou-vertoning, beweeg Dolla ’n bietjie weg van politiek, “want dis regtig nou boring”, alhoewel daar elke nou en dan per ongeluk ’n onbeplande dwarsklap “gebeur”. Sy grap weer met ons samelewing, die verskillende rasgroepe se manier van stres hanteer en die slaagsyfers, mans en ander alledaagse onderwerpe loop alles onder haar skerp tong deur.
Sy vra of daar enigiemand van Stellenbosch daar is, want sy is nuuskierig oor watter taal hulle nou op hul dorp mag praat, en die gehoor skater toe sy vra wat die nuutste toelatingsvereistes is vir universiteit: “’n pakkie Blitz?”
Dolla spog met haar splinternuwe blou rok met sy vere-onderstuk. “Dis my kuberruimte-kostuum: Dolla voel vere,” verklaar sy terwyl sy selfvoldaan aan haar rooi stokkielekker lek.
Sy glo Suid-Afrikaners se nuwe stokperdjie is om kwaad te wees. Sommer vir alles. “As ons kwaad is, is ons gelukkig,” is haar opvatting. Niks maak ons gelukkig nie, alles maak ons kwaad.
Sy onthul die werklike redes hoekom vrouens nog mans “aanhou”, sy ontleed die Suid-Afrikaanse “braai” in detail uit ’n blonde sielkundige se oogpunt en haar oplossing vir Suid-Afrikaners se stres is ’n skreekamer. Soos sy tereg sê: As ons tuis ons woede en frustrasie in ’n klankdigte kamer kon uitskree voor ons die wêreld sou aandurf, sou mense soos Penny Sparrow nog haar werk gehad het en die hele land nie vir haar kwaad gewees het oor haar uitlatings op sosiale media nie.
Sy spot weer soos van ouds met kort, bles, boepens mans wat glo hulle kan beledigings na reuserugbyspelers slinger; verduidelik dat sy bang is vir swanger word en dat haar vriende vir haar ’n boek vir Kersfees gegee het (50 Shades of Grey) en dat sy gedink het dis ’n haarsalon manual ...
Sonder politieke verwysings voel dit asof mens nog meer ontspan en harder saamlag, want in soveel van haar sketse herken jy jouself of vriende of bure.
Dit waarvoor die naïewe Dolla nie kans sien nie of waarvan sy dalk heeltemal onbewus is, takel haar dowe ouma heel gemaklik. Sy maak vir die eerste keer in hierdie vertoning haar verskyning en word ook vertolk deur Margit Meyer-Rödenbeck. Sy kritiseer moderne popgroep-name soos Koos Kombuis, Valiant Swart (“wat weet daai mannetjie van ’n Valiant – ek kan hom ’n ding of twee leer”), Kommissie van Ondersoek (“asof ons nie al genoeg daarvan in ons land het nie”) en skynmaagde (“wat, jy lyk soos ’n hoer, maar jy is ’n maagd?”) en die ouer gehoor skaterlag waarlik vir haar.
Sy is ook nie bang om hier en daar ’n vloekwoord baie treffend te gebruik nie en drink mildelik uit haar “jenewerglasie” vir ekstra moed.
Dis heeltemal te verstane hoekom Dolla se vertonings verlede jaar een van die KKNK se top 10 verkopers was en haar vertonings reg oor die land elke jaar uitverkoop. Ek glo hierdie vitamine D-inspuiting gaan regtig weer woema in jou moeë nuwejaarskuite sit.
#dowwedolla
Met: Margit Meyer-Rödenbeck
Teks en lirieke: Jurgen Human
Musiek en spelleiding: Emile Minnie
Tydsduur: 75 minute
- 9 Februarie, Barklystraatteater op Uitenhage: 041 922 0575/082 809 4272;
- 10 Februarie, Little Theatre, Belmont Terrace in Port Elizabeth: kaartjies by Westway Café (041 365 0217);
- 1 Maart, Woordfees, ATKV Boeketent: kaartjies by Computicket;
- 7 Maart, Woordfees, Hoërskool Stellenbosch, kaartjies by Computicket;
- 24 Mei, Die Boer Restaurant-teater, Durbanville (021 979 1911) of aanlyn by www.dieboer.com.
Geen onder 12's. (Taalgebruik.)
The post Teaterresensie: Dowwe Dolla gee jou ’n lekker dosis vitamine D(olla) appeared first on LitNet.