Foto van André Trantraal: verskaf
Keegan & Samier: Die sokker-fiasko
André Trantraal
LAPA
ISBN: 9780799397697
André Trantraal praat met Naomi Meyer oor sy Sala-kinderboektoekenning waarmee sy boek Keegan & Samier: die sokkerfiasko pas bekroon is.
André, jy het pas ’n Sala-toekenning gekry vir jou kinderboek Keegan & Samier: die sokkerfiasko. Wie is Keegan en Samier? Is hulle gebaseer op kinders wat jy ken?
Keegan en Samier is beste vriende, koptjommies. My susters het seuns wat ek sien grootword. So ek veronderstel party van die houdings en maniertjies van Keegan en Samier kom van hulle af. Die meisiekinders in ons familie is maar almal baie eiewys, wat gehelp het om Samia se persoonlikheid aan te vul.
Dis nie Keegan en Samier se eerste storie nie. Jy het al ander boeke ook in die reeks geskryf. Vertel my ’n bietjie hiervan, asseblief. Watter ander stories is beskikbaar?
Daar is vier boeke in die reeks. Die stories kan op hulle eie gelees word, maar as jy dit van boek 1 na boek 4 lees, dan sien jy hoe die karakters geleidelik ontwikkel. Ek hou van ’n goeie plot, al dink ek dat hulle nogal swaar kan wees om in die hande te kry. Die vierde boek bevat selfs effe van ’n plot twist. Die boek het recurring karakters, maar my gunsteling is beslis ouma Mienie. Ons het almal iemand soos sy nodig, iemand wys wat jou ook deur dik en dun bystaan. LAPA het die boeke baie bekostigbaar gemaak juis sodat jy al vier kan koop.
Jy skryf ook gedigte en graphic novels. Hoe is dit vir jou om ook vir kinders te skryf? En hoe weet jy wat werk vir 'n kinderstorie?
......
Ek stem saam met die legendariese skrywer en illustreerder Maurice Sendak wat geglo het dat daar nie iets soos kinderboeke bestaan nie, slegs goeie boeke en slegte boeke.
......
Ek stem saam met die legendariese skrywer en illustreerder Maurice Sendak wat geglo het dat daar nie iets soos kinderboeke bestaan nie, slegs goeie boeke en slegte boeke. Sendak het geglo dat ’n boek wat jy ontgroei soos ’n ou paar skoene, ’n slegte boek is. Ek lees net so graag Elena Ferrante as wat ek byvoorbeeld Tove Jansson lees. Ek hou van eenvoud en vind die stadig ontvouende spectacle van die alledaagse fassinerend. Dit is waar die grootste avonture maar tog gebeur.
.......
Ek hou van eenvoud en vind die stadig ontvouende spectacle van die alledaagse fassinerend. Dit is waar die grootste avonture maar tog gebeur.
.......
Watter storie wil jy vir Suid-Afrikaanse kinders vertel deur hulle stories te skryf? Iets vir die lekker, vir ontvlugting, of om vir hulle iets te skryf wat hulle sal herken, waar hulle hulself sal sien?
Ek skryf stories vir elke kind, maar ek verkies om karakters te skep wat nou lank wag vir hul beurt om in ’n kinderboek te verskyn.
Wat beteken ’n toekenning soos hierdie een vir jou?
........
Dit is wonderlik om erkenning te kry, maar my groot hoop is dat dit dalk ander bruin en swart skrywers sal inspireer om ook die kinderboekwêreld te betree. Dit is lankal tyd.
.......
Keegan & Samier: die sokker-fiasko het twee pryse vanjaar gewen: ’n ATKV-Woordveertjie, waarvoor kinders self stem, en nou die Sala. Dit is wonderlik om erkenning te kry, maar my groot hoop is dat dit dalk ander bruin en swart skrywers sal inspireer om ook die kinderboekwêreld te betree. Dit is lankal tyd.
Lees ook:
Press release: 16th South African Literary Awards, the 2021 winners
The post Sala-toekennings 2021: ’n Onderhoud met André Trantraal appeared first on LitNet.