Wessel Pienaar, Hanna van Niekerk en Dionē Prinsloo
Foto: Naomi Bruwer
Die Huberte Rupertprys vir klassieke musiek is aan Hanna van Niekerk toegeken.
Huldigingswoord: Izak Grové (gelewer deur Dionē Prinsloo)
Hanna van Niekerk is 'n boorling van Vryburg. Sy sou mettertyd een van die bevoorregte leerlinge van die vokale kunstenaar Sarie Lamprecht se private ateljee in Johannesburg word. As mens in ag neem dat Lamprecht 'n leerling van die legendariese sopraan Betsy de la Porte was, dan is Hanna die artistieke kleindogter van 'n sangeres wat sekerlik as die moeder van solosang in Suid-Afrika was. Latere onderwysers was Hildegard Rössel-Maydan in Wene en Maria Hittorff in Bonn.
Volgens die maatstaf van opera-optredes het Hanna veel tot haar krediet. Haar hoofrolle in operaproduksies soos Madama Butterfly, La Bohème en Nabucco vir die destydse TRUK, en talryke soortgelyke optredes vir ander kunsterade van die tyd, en by die gewilde Roodepoortteater. Sy was ook een van die sangers in die televisiereeks Encore, waarin sy saam met sangers soos Werner Nel, Mimi Coertse en Manuel Escorcio gedramatiseerde opera-arias voorgedra het.
As opera-optredes die droom van die tipiese professionele sanger is, dan verteenwoordig die meer intieme vorm van die kunslied 'n artistieke uitdaging van 'n ander aard, maar ewe rigtingwysend vir 'n loopbaan in die kunstewêreld. Die kunslied, en meer spesifiek die Afrikaanse kunslied, sou mettertyd die middelpunt van haar loopbaan vorm. Haar verowering van die sangersprys in die SAUK Musiekpryskompetisie in 1980 sou lei tot etlike opnames en konsertoptredes in dié genre.
Etlike groter projekte gewy aan die lied sou volg, soos die eerste volledige uitvoerings en opnames met pianis Heinrich van der Mescht van die werk van Afrikaans se eerste volwaardige liedkomponis, Arnold van Wyk, as solis in Hennie Joubert se destydse televisiereeks Aan die Lied. Met haar opnames van buitelandse kunsliedversamelings saam met bariton André Howard en pianis Albie van Schalkwyk in uitvoerings van Wolf se volledige Italienisches Liederbuch, en die werk van Samuel Barber, het sy ook 'n deeglike stempel as uitvoerende radio-kunstenaar gelaat. Sy was 'n stigterslid en vir die laaste 5 jaar ook organiseerder van die Kaapse Liedmakersgilde, wat reeds sedert 1994 gereelde kunslieduitvoerings aanbied.
Benewens praktiese bydraes soos hierdie het me Van Niekerk haar kundigheid ook met sorg oorgedra aan 'n skare van sangleerlinge aan die Universiteit van Potchefstroom (tans Noordwes), die Universiteit van die Vrystaat en sedert 2009 aan die Universiteit van Kaapstad. Haar pionierswerk hier het gelei tot etlike van haar studente as nasionale en internasionale pryswenners.
Meneer die voorsitter, ek versoek u om die Huberte Rupertprys vir Klassieke Musiek aan Hanna van Niekerk te oorhandig.
Stellenbosch
21 Junie 2017
The post Akademiepryse 2017: Huberte Rupertprys vir klassieke musiek aan Hanna van Niekerk – commendatio appeared first on LitNet.