“Die tema vir Afrikaweek 2017, Ontsluiting van die demografiese dividend deur investering in die jeug, vereis nuwe denke oor die verhouding tussen taal en opvoeding in Suid-Afrika,” sê Sinki Mlambo, direkteur van die Afrikaanse Taalraad (ATR).
Sinki Mlambo
Mlambo, wat gister by ’n mini-aanlynkonferensie oor taal en ontwikkeling gepraat het, noem dat Suid-Afrika se jeug benadeel word deur die onderwysstelsel wat nie op alle vlakke voorsiening maak vir leer in die inheemse tale nie. “Huistaal is die belangrikste faktor in ’n leerder se prestasie op skool,” sê sy. Hierdie standpunt word deur ’n onlangse WNNR-studie (Wetenskaplike en Nywerheidsnavorsingsraad) oor huistaal en skoolprestasie bevestig, veral ten opsigte van vakke soos wiskunde en wetenskap.
Ria Olivier
"Die idee dat die land se inheemse tale nie gebruik kan word om komplekse kwessies te verduidelik nie, is op ’n koloniale mite gebaseer", sê Ria Olivier, ATR-programbestuurder. “Leerders kan Engels en vakke soos wiskunde baie beter deur hulle moedertaal bemeester. Hulle het kwaliteitopvoeding in die taal wat hulle die beste verstaan nodig.” Onderwysers moet dus geleer word hoe om klaskamers met kinders vanuit ’n verskeidenheid van taalagtergronde te hanteer, ’n algemene situasie in baie skole.
Conrad Steenkamp
“Taal kan gebruik word om die jeug te ontwikkel en die ekonomie te transformeer,” sê Conrad Steenkamp, hoof van die ATR. “Dis nie ’n koste nie, maar ’n hulpbron. Dis nie ’n probleem nie, maar ’n oplossing. Ons sal ons denke oor taal en opvoeding dringend moet verander.”
The post Afrikaweek 2017: Investeer in die jeug deur taal appeared first on LitNet.