PEN Afrikaans, die Afrikaanse afdeling van PEN Internasionaal, soek twee jong kortverhaalskrywers tussen 18 en 30 jaar oud om te benoem vir ’n internasionale kompetisie waarin die wenner $1 000 en ’n reis na die volgende PEN International-kongres kan wen.
Geakkrediteerde PEN-sentra mag elk twee ongepubliseerde skrywers, ’n man en ’n vrou, vir hierdie kompetisie benoem. Skrywers mag nie op eie stoom vir die kompetisie inskryf nie en slegs benoemings deur PEN-sentra sal aanvaar word.
PEN Afrikaans sal op eie koste die twee wenskrywers se kortverhale in Engels, Frans en Spaans laat vertaal en hul kortverhale vir die kompetisie inskryf. PEN Internasionaal se beoordelaars kies dan uit al die sentra se inskrywings drie finaliste om in September of Oktober 2016 die PEN Internasionaal-kongres by te woon. (Die land waar die 2016-kongres gaan plaasvind, is nog nie gefinaliseer nie, maar België, Mexiko en Bolivië is moontlikhede.)
Die wenner kry $1 000 en die weninskrywing word in die PEN International-tydskrif gepubliseer. Selfs indien finaliste nie wen nie, kry hulle waardevolle blootstelling deurdat werk gelees word deur ’n invloedryke beoordelaarspaneel.
Om deel te neem moet skrywers voor of op 15 Desember 2015 ’n getikte kortverhaal van tussen 2000-3000 woorde stuur aan penafrikaans@gmail.com . Hulle moet ook ’n kopie van hul ID saamstuur asook volle naam, woonadres, en kontaknommers. Verhale wat nie die voorgeskrewe lengte is nie, word gediskwalifiseer. Merk assbelief jou e-pos-inskrywing duidelik deur die onderwerp aan te gee as: “Inskrywing vir PEN New Voices-toekenning 2016”.
Die twee skrywers wat vanjaar gekies word, sal boonop ’n kans staan om opgeneem te word in die eerste US Woordfees-kortverhaalbundel wat in Maart 2016 by dié fees in Stellenbosch bekendgestel word. Die samestellers van die Woordfees-bundel, Anastasia de Vries, Suzette Kotzé-Myburgh en Madri Victor, behou egter die reg om te besluit of die twee jong PEN-kandidate se werk aan die literêre standaarde vir hul bloemlesing voldoen. (Vir meer inligting oor dié feesbundel, sien: http://www.litnet.co.za/fotos-us-woordfees-stel-nuwe-kortverhaalbundel-bekend/)
KOMPETISIEREëLS
- Deelnemers moet op 30 Junie 2016 18 jaar of ouer; en jonger as 30 jaar wees (let egter op die sluitingsdatum van 10 Junie).
- Die kompetisie is slegs oop vir skrywers wat nog nie ’n boek gepubliseer het nie. Bydraers tot bloemlesings soos Nuwe Stemme en Nuwe Stories mag wel inskryf, mits hulle aan die ouderdomsvereiste voldoen.
- PEN Afrikaans behou die reg voor om ’n wenner of wenners aan te wys slegs indien die gehalte van inskrywings dit regverdig.
- Kortverhale moet in Afrikaans wees.
- Kortverhale moet getik en in Word-formaat wees.
- Kortverhale moet tussen 2000 en 3000 woorde lank wees. Inskrywings wat nie aan hierdie vereiste voldoen nie, sal gediskwalifiseer word.
- Slegs een inskrywing per deelnemer. Indien meer as een inskrywing ontvang word, sal slegs die eerste gelees word.
- Die sluitingsdatum is Dinsdag, 15 Desember 2015 om 14:00, Suid-Afrikaanse tyd. Geen laat inskrywings sal aanvaar word nie.
- Slegs e-pos-inskrywings word aanvaar.
- E-pos-inskrywings moet duidelik gemerk word deur die onderwerp aan te gee as: “Inskrywing vir PEN New Voices-toekenning 2016”.
- Inskrywings moet vergesel word van ’n afskrif van die skrywer se ID of paspoort.
- Inskrywings moet vergesel word van deelnemer se volle naam, woonadres en kontaknommers (telefoonnommers).
- Die beoordelaars se besluit is finaal en geen korrespondensie sal daaroor gevoer word nie.
- PEN Afrikaans se beslissing sal geneem word deur ’n beoordelaarspaneel wat uit die PEN Afrikaans-bestuurslede saamgestel is.
- Aangesien daar min tyd is om die vertalings te laat doen, sal die vertalers se oordeel vertrou word en sal daarby volstaan word.
The post Jong skrywers: Wen $1000 en kry ’n kans om opgeneem te word in die US Woordfees 2016-kortverhaalbundel appeared first on LitNet.