Fotobron: www.cray.com
What is there here but weather?
- Wallace Stevens: "Waving Adieu, Adieu, Adieu"
Stevens se woorde het my die eerste keer in Duitsland getref ja!
het ek gedink – só
is dit niks hier behalwe
vier jaargetye en die afwesige medemens nie niks
in die weegskaal nie só
is die lewe ná die dood geborge niks behalwe
die klank van cappuccino-masjiene en Duitse
ditjies en datjies nie niks oor behalwe
skinder nie al genade is om jouself
so stadig moontlik
op te lewe,
maar dit was net
’n droom van ’n Wes-Europa voor die sondvloed
vlugtelinge ’n saai depressie in slowmo 20 jaar gelede 20 jaar later
terug in die onderste-Boland het almal bang geword vir die weer
wat só verander – die vier versteurde jaargetye gaan verward verby
die verkeerde klankbaan vir die verkeerde fliek niemand
kan meer tussen die spesiale effekte
van globalisering, vooruitgang en verval onderskei nie die korrupte son brand al
feller die seevlak styg stadig maar vinniger as die posdiens dog seker
soos ’n uitsettingsbevel van God wie kan nog sê wie
die ware plakkers
hier tussen die berge en die see is wie
al die brandsiek sportmotors tussen soveel voetgangers op die N2
saam met soveel beskaamde hoop
hier in en om al die Kaap se bevryde seer plekke losgelaat het?
Hier brand die weer soos die mense hier vrek
die vier seisoene ook nog een van die dae
aan blootstelling
terwyl ’n vet prossie argeloos ’n veldtie vang
langs die afrit na die highway through hell en die kamma-seerowerseile
van Cape Town Film Studios en my dogtertjie vra:
“Wie se beeste loop hier, Pappa?”
Wat is daar inderdaad hier behalwe
die verdwaalde beeste, arm en ryk plakkers
en ek en klein Lea (7) vrolik
op pad na die pikkewyne by die Kaapse akwarium
saam met al die ander –
toeriste van die laaste dae?
The post Wat is daar hier? appeared first on LitNet.