Fotobron: https://romanzalesers.wordpress.com/2016/07/04/santie-van-der-merwe-gesels/
Anderkant vergeet
Santie van der Merwe
LAPA
ISBN: 9780799380231
Anderkant vergeet is Santie van der Merwe se derde roman. Van die eerste hoofstuk af slaag sy daarin om afwagting te skep by die leser; van die ontnugtering waar Anneleen Gericke ontwaak in die hospitaal – ‘n verwarde 42-jarige ma van twee kinders, maar met 24 jaar wat totaal en al vergete is.
Die leser ervaar kompleet haar magteloosheid ná ‘n motorongeluk wat haar laat met geheueverlies; die meegaande onsekerheid van wie sy is, wie sy was en wie sy vandag is. Dit bring die vraag tuis: Wie en wat is ‘n mens sonder jou herinneringe? Herinneringe is wat jou vorm, wat van jou die persoon maak wat jy is.
Deurgaans is Anneleen, wat na haarself verwys as Anderleen, in konflik met haar rol as werkende vrou, moeder en vrou vir ‘n man van wie sy kan onthou sy op haar matriekafskeid mee uitgemaak het. Anneleen is ‘n volwasse vrou, met die herinneringe, jeug, onskuld en toekomsdrome van ‘n jong ontwakende vrou op pad is na haar matriekafskeid saam met haar beste vriende.
Nou moet sy die gaping waarin die mees vormende gebeure plaasgevind het, probeer oorbrug met inskrywings wat in joernale verewig is. Sy moet buitelyne begin trek en die prentjies inkleur oor wie sy was, behalwe dat sy nie meer saamstem met of die mens voel wat sy eens was nie. Die skrywer slaag daarin om jou in te nooi in die karakter se lewe, sommige oomblikke verkeer jy byna asof in haar liggaam, beleef jy haar emosies intens, die hartseer, onsekerhede en magteloosheid en ook die vreugde.
Alhoewel die storie uit Anneleen se perspektief vertel word, kry die leser blikke van wat haar gesin, haar man en kinders ervaar. Die hartseer omdat sy nie onthou nie, die verwyte, die seer en angs oor wat die toekoms inhou. Hoofstuk vir hoofstuk pluis Anneleen haar lewe uit, voel sy haar weg na die persoon wie sy voorheen was tot die persoon na wie sy gegroei het en vandag is.
Van der Merwe fokus veral op Jolandie, hul 18-jarige dogter wat self op die vooraand van haar matriekafskeid en volwassenheid staan. Dit verskuif ietwat die grense wat ‘n wyer ouderdomsgroep inlaat om met die karakters te identifiseer, veral omdat dit die ouderdom is waarop Anneleen se lewe die eerste keer onherroeplik verander het.
Dít gee haar ‘n voorsprong om te probeer sin maak van Jolandie se onstuimige emosies en dien as ‘n aanknopingspunt om haar moeilike dogter weer te leer ken en van nuuts af ‘n verhouding te probeer opbou.
Die pad wat Anneleen stap word begelei met ‘n boeiende storie en ‘n maklike leesvloei wat daarin slaag om afwagting te skep. Met tye ervaar die leser voelbare emosies wat aan mens se hartsnare pluk. Geslaagde humor kleur die blaaie in, iets waarmee nie alle skrywers sukses behaal nie. Haar woordspelings is vermaaklik en stof tot nadenke: Dat die lewe ‘n konstante leerskool is en dat seerkry meestal iets buite menslike beheer is, maar dat daar wél positiwiteit en nuwe lewe daaruit kan vloei mits jy jouself daarvoor oopmaak.
Die skrywer laat die leser opnuut die belangrikheid asook die beskerming van ‘n ouerhuis begryp, dinge soos oop kommunikasiekanale en die noodsaaklikheid om deur dik en dun nou betrokke te wees by jou gesinslede. Die kwessies wat ingeweef is in die verhaal spreek veral tot die vroulike geslag en word vanuit hul oogpunt gesien. Dit is almal kwessies waarmee die meeste mense kan assosieer.
Santie van der Merwe se jongste roman, Anderkant vergeet, is beslis iets wat meeste liefhebbers van Afrikaanse liefdesverhale in hul versameling sal verwelkom; ‘n roman wat ‘n indruk op jou sal laat en wat beslis nie vergete sal wees nie.
The post Boekresensie: Anderkant vergeet deur Santie van der Merwe appeared first on LitNet.