Fotoblad: #feesmustfall-betoging in Londen

Betogers sing saam in die strate van Londen. Baie van die betogers het eers by die Universiteit Kollege in Londen bymekaargekom en van daar af na die Suid-Afrikaanse hoëkommissariaat in Londen opgeruk.

'n Betoger skryf slagspreuke op 'n stuk karton wat sy later as ‘n plakkaat in die betoging gebruik het.

'n Man loop met 'n “We Stand With You”-plakkaat in die strate van Londen, terwyl 'n kenmerkende Britse rooi bus verbyry.

Betogers het 'n wye verskeidenheid plakkate saamgedra, met slagspreke wat wissel van “Remember Marikana” tot “#NationalShutdown”.

Onder diegene wat betoog het, was Sizwe Mpofu-Walsh (heel regs), die seun van Dali Mpofu. Mpofu-Walsh, 'n aktivis, het onlangs aan die Universiteit van Oxford gegradueer.

Betogers het van verskeie dele van Engeland af gestroom.

Athinangamso Nkopo, 'n MSc-student aan die Universiteit van Oxford, praat met ander betogers. Sy het dikwels die groep se liedere gelei. Sy het vertel hoe sy pas vanaf Suid-Afrika gekom het, waar sy by die Universiteit van die Witwatersrand betoog het. "Dit is ongelooflik om te sien hoe dit uitgebrei het," het sy gesê.

'n Metropolisieman sê vir 'n betoger die groep moet van die straat af wegbly. Metropolisie het later aan joernaliste gesê hulle het van die “onwettige” betoging gehoor eers toe dit aan die gang was. Hulle het dikwels probeer om betogers weg van die straat te hou nadat verkeer vir minstens 20 minute deur singende betogers versper is.

By die Suid-Afrikaanse hoëkommissariaat in Londen het daar voortdurend nog betogers by die groep aangesluit. Leiers het gesê hulle gaan nie die gebied verlaat voordat Obed Mlaba, die Suid-Afrikaanse hoë kommissaris in Londen, persoonlik 'n memorandum by betogers kom teken nie.

'n Polisievrou hou 'n ogie oor betogers.

Mense is kans gegee om hul solidariteit met die betogings in Suid-Afrika uit te spreek en hul eie stories te vertel.

Basani Baloyi, 'n student aan die Universiteit van Londen, sing saam met betogers. Betogers het later probeer om by die kommissariaat in te kom, maar is deur polisie gekeer. Twee mans het egter tydens die betoging deur die veiligheidshekke van die ambassade geglip en in die vensters gesit. Jared Sachs, een van die betogers, is later op 'n aanklag van strafregtelike skade gearresteer.

'n Groep betogers dans voor die gebou terwyl hulle vir die kommissaris wag.

Polisie het gedurig met leiers en betogers in gesprek getree oor hul eise en oor veiligheidskwessies.

'n Polisieman gryp 'n betoger. Na afloop van die betoging was daar 'n onderonsie tussen die polisie en betogers toe die twee mans wat in die vensters gesit het, afgeklim het en deur die polisie agterna gesit is. Verskeie betogers het hulle probeer keer.

Daniel Ambor, oorspronklik van Kaapstad, sit in die venster van die gebou. Ambor is na die betoging omring, maar is deur 'n vrou, ene Nana, beskerm. Betogers het gedreunsing dat hy vrygelaat moet word. Polisie het aan bystanders gesê omdat hy 'n diplomatieke gebou op so 'n wyse betree het, moet sy besonderhede geneem word. Hy is later vrygelaat.

Ambor, een van die mans wat in die vensters gesit het en deur polisie ondervra is, word deur betogers omhels nadat hy vrygelaat is.

Die Suid-Afrikaanse hoëkommissaris, Obed Mlaba, sit op die vloer en luister na betogers. Nadat hy eers 'n stoel gebring het om op te sit, het betogers geëis dat hy “op hulle vlak” met hulle praat en nie van 'n verhewe posisie af nie.

Betogers kyk hoe Mlaba op die vloer sit.

Mlaba teken die memorandum. Die betogers het onder meer geëis dat tersiêre opleiding se gelde nie verhoog word nie en dat alle universiteite “gedekoloniseer” word.