Denmarkstraat naby die West End en teaterarea van Londen is aanvanklik gedurende die 17de eeu deur prins George van Denemarke ontwikkel. Sedert die 1950’s word die straat met Britse populêre musiek geassosieer. Dit is hoofsaaklik te danke aan uitgewers, opneem-ateljees en later musiekwinkels wat daar gevestig is.
Uitsig op Denmarkstraat
Die straat is slegs 108 m lank en net om die draai van die bekende Tottenham Court Road-moltreinstasie. Dit was eenmaal ’n woongebied, maar word later vir kommersiële doeleindes ontwikkel. Een van die eerste en bekendste inwoners was Augustus Siebe, pioniervervaardiger van onderwaterduikhelms wat saam met seilduikpakke gebruik is.
Gedurende 1911 word die eerste klein musiekuitgewer in die straat gevestig. Verskeie jare later, in 1926, kom die eerste musikantjoernaal, Melody Maker, daar tot stand. Met die aanbreek van die jare ‘50 vind die invloedryke New Musical Express (NME) sy ontstaan in Denmarkstraat. Teen die einde van die dekade is Brittanje se eie “tin pan alley” met verskeie musiekuitgewers en aanverwante besighede gevestig.
Met die aanbreek van die ‘60’s het die musiekuitgewers begin verdwyn, omdat hulle tred met die veranderende voorkeure van die tyd verloor het. Klankateljees het opgeskiet soos wat die Britse bluesgroepe die musieklandskap oorgeneem het. Die Rolling Stones het hul eerste album by Regent Sound Studios opgeneem. Later sou ook Black Sabbath hier ’n album opneem.
Regent Sound Studio
Verskeie klankateljees het daarna orals in die straat en aangrensende gebied opgeskiet. Jimmy Page en John Paul Jones (later Led Zeppelin) was gereelde sessiemusikante in die Denmarkstraat ateljees. The Kinks met Jimmy Page (kitaar) en John Lord (klavier) het hulle treffer “Girl you really got me now” in een van die kelderateljees opgeneem. Vele sou later volg. Met die ontstaan van die punkbeweging gedurende die middel-‘70’s neem die Sex Pistols hul intrek by nr 6 en Denmarkstraat sou nooit weer dieselfde wees nie.
Rondom hierdie tyd ontstaan ook verskeie musiekwinkels in die straat. Name soos Wunjo Guitars en Hank’s Guitar Shop sou later ikoniese status verwerf, namate bekende rockmusikante op soek na musiekinstrumente die straat besoek het. Vandag volhard ‘n paar steeds, ten spyte van die eskalerende huurgelde.
No Tom stal steeds hul kitare trots uit.
Die straat het deur die jare ’n groot aantal restaurante en klubs gehuisves. Die Gioconda Café by nr 9 is deur bekendes soos David Bowie en die Small Faces besoek. Een van die bekendste klubs was die 12 Bar Club van 1994 tot 2015. Die klub was oorspronklik ’n sosiale bymekaarkomplek met musiek as afwisseling. Dit is bedryf deur die personeel van die kitaarwinkel aan die agterkant van die perseel. Later is dit uitgebrei en herdoop – bekendes soos Adele, KT Tunstall, Seasick Steve en Jeff Buckley, om maar ’n paar te noem, sou later hier optree.
Met deurlopende ontwikkeling in die gebied het die verhuurder gedurende 2013 versoek dat die klub se huurkontrak beëindig word. Agtien maande later, na ’n hofsaak, ’n petisie wat 17 000 handtekeninge getrek het en die ondersteuning van Pete Townshend (The Who), is die klub se deure op 16 Januarie 2015 gesluit.
Die 12 Bar Club
Alhoewel verskeie kitaarwinkels steeds in die straat handel dryf, is hulle onder toenemende druk om te sluit. Die nuwe Crossrailprojek wat Reading wes van Londen per spoor verbind met Stratford in die ooste, dreig om alles in sy pad deur die stad te verorber en nuwe korporatiewe ontwikkelings daar te stel.
Vir ’n meer uitgebreide geskiedenis en huidige ontwikkeling van Denmarkstraat, kyk gerus die video hier onder.
Teks en foto’s deur Stephen Fourie
Foto van Stephen Fourie: Leonie Dyamond
The post Londen se “tin pan alley” appeared first on LitNet.