Istanboel se Aya Sophia (foto: Judith Doubell)
Die Russe en die Duitsers bly dié somer vir die eerste keer weg van Turkye. Dit is daarom die beste tyd nog om te kom kuier, skryf André-Pierre du Plessis uit Istanboel.
Dis te verstane dat niemand wil reis nie. Met die rand op ’n nuwe laagtepunt teenoor die dollar, pond en euro is dit buitensporig duur om dié winter eerder in die noordelike halfrond se somerson deur te bring.
Daar is egter een uitsondering.
Die Turkse lira mag dalk sterker lyk teenoor die euro as onse rand, maar jy kry soveel meer vir wat jy betaal in Turkye as elders in Europa. En buiten die goedkoper reisprys is dié land desperaat vir toeriste.
Drie bomaanvalle oor vyf maande is nie die beste advertensie vir Turkish Airlines wat vanaf einde verlede jaar direk van Kaapstad, Durban en Johannesburg na Istanboel vlieg nie.
"Ek wil nou nie simpel wees en als glo wat ek lees en my trip kanselleer as dit nie werklik nodig is nie," skryf ’n vriendin onlangs aan my, skepties oor haar veiligheid as sy besluit om in Istanboel te kom toer. "Maar ek wil ook nou nie in die middel van ’n war zone instap nie."
Nagtelike Istanboel (foto: Judith Doubell)
Turkye, en spesifiek Istanboel, is allesbehalwe ’n oorlogsone. Die burgeroorlog wat oor die laaste vyf jaar in Sirië woed is op baie se lippe en het implikasies vir Turkye se verhouding met Europa. Twee miljoen vlugtelinge uit Sirië is nou woonagtig in Istanboel. Hulle bedel en verkoop sakdoekies, maar probeer uiteindelik hulle weg vind oor die Egeïese See na Griekeland. Turkye doen alles in hul mag om die situasie te verbeter, nie net in hul buurland nie, maar ook vir die Turke, wat moeg raak om so tegemoetkomend te wees vir die miljoene wat ná vyf jaar ’n las op die land se ekonomie is.
Ten spyte van vele beloftes uit Europa dat ’n kwotastelsel ingestel sal word waarvolgens vlugtelinge uit Sirië na verskeie Europese lande sal gaan, speel onder andere Brittanje en Oostenryk eenvoudig nie saam nie. Europa se teenkanting teen die verwelkoming van miljoene wat ’n werklike oorlogsone probeer ontvlug, het werklik net op Turkye en Griekeland ’n merkbare impak.
Maar die verrassende ding is ’n mens sien nie noodwendig wat dié impak is nie. In ’n stad soos Istanboel, die vyfde grootste in die wêreld ten opsigte van sy inwoners, is daar reeds 14 miljoen mense en daarom is die twee miljoen ekstra amper onmerkbaar. Dis ’n geweldige mengel van Midde-Oosterse, Asiatiese en Europese kulture waarin iemand afkomstig van ’n diverse land soos Suid-Afrika maklik tuis kan voel.
Ongelukkig is die persepsies wat die media skep, die rede hoekom my vriendin, soos miljoene ander, glo dat Turkye in die middel van hul eie oorlog is.
Dynserige Istanboel (foto: Judith Doubell)
Die wêreld se grootste toeroperateur, TUI, sê besprekings na Turkye het met 40% gedaal in vergelyking met 2015. Die meeste passasierskepe wat somermaande vanaf Istanboel vertrek of terugkeer vanaf ’n toer deur die Middellandse See het dié stad nou uit hulle reisplanne gelaat. Dit alles op ’n tyd wanneer Turkye belê om hul land se grense te beveilig en ekonomies nie noodwendig in ’n goeie plek is nie. Hoewel klein besighede langs die Bosporus en op die Grand Bazaar bly glo dat die komende somerseisoen net so winsgewend sal wees soos verlede jaar, kan hulle reeds sien hoe stil die strate geword het.
In Januarie het ’n bom op Istanboel se populêrste toerismepunt, Sultanahmet-plein, 13 toeriste se lewens geëis; 12 was Duitsers, Turkye se hoofbron van besoekers.
Naas Duitsland bring Rusland die meeste toeriste na Turkye. Maar Russe wil ook nie meer Turkye besoek nie en vlugte tussen die twee lande is opgeskort. Die rede daarvoor is ietwat meer gekompliseerd en laat sekere kenners glo dat ’n nuwe Koue Oorlog tussen Moskou en Ankara aan die broei is.
In Oktober het president Recip Tayyip Erdogan en Wladimir Poetin blad geskud en vriendelik geglimlag vir die wêreld se media tydens die G20-leiersberaad. ’n Maand later is ’n Russiese vegvliegtuig deur Turkye neergeskiet. Die Turkse weermag het gesê die vliegtuig het oor die Turkse grens gevlieg en is gewaarsku om na Sirië, waar Rusland militêre steun aan die President verleen, terug te keer. Maar dit was ’n gebeurtenis waardeur Russe, en spesifieke Poetin, verneder is. Hy doen nou alles in sy mag om bande met Erdogan te beëindig.
Turkye het reuse-vakansieoorde aan sy Mediterreense kus, waarvan baie lyk soos Sun City plus ’n regte see. ’n Mens besef nie wat die impak van die verlies in toerisme is tot jy sulke vakansiedorpies soos Altanya, net oor ’n uur se vlug vanaf Istanboel, besoek nie. Hier is alle hotelbordjies en aanwysings in Duits, Russies, Turks en dan eers Engels. Verhitte swembaddens en hotelkamers is leeg. Dié wat sulke hotelle aan die lewe gehou het, gaan eenvoudig nie kom kuier nie.
Gevolglik is daar meer plek vir ons Suid-Afrikaners wat so lief is vir warm seewater, seekos en doodeenvoudig goeie geselskap.
So vergeet vanjaar van Parys, Milaan en Amsterdam. Jy gaan ’n hartaanval kry oor hoe duur dinge daar geword het – vra my. Kom kuier eerder in Istanboel.
Foto's: Judith Doubell
Besoek ook haar webwerf met foto's van Turkye hier.
The post Is Turkye 'n oorlogsone? appeared first on LitNet.