Bertie du Plessis is op 17 Desember na ’n kort siekbed aan kanker oorlede. Dit was vir almal wat na aan hom was ’n groot skok, want hy was so aktief en suksesvol as die Chief Learning Officer van die Naspers Groep die afgelope twee en ’n half jaar. Hy het wyd rondgereis en vernuwende meesterklasse en werkswinkels met onderwerpe soos UX-ontwerp, “Big data”, Strategie deur Harvard-gevallestudies, en vele meer vir die Naspers-groep binne Suid-Afrika aangebied, sowel as wêreldwyd in stede soos São Paulo, Hongkong en Poznań, Pole, met die hulp van net die top-deskundiges in die wêreld.
Bertie was ‘n indrukwekkende mens wat jy nie maklik sou vergeet na ’n ontmoeting nie. Hy was ’n man van vele talente en het ’n onuitputlike honger na kennis gehad – sommige van die beskrywings wat mense al aan hom toegedig het, sluit filosoof, veelsydige teoloog, kommunikasiekundige, strategieadviseur en kunstenaar in. Op sy nuutste webtuiste (www.bertieduplessis.com) beskryf hy homself as “Change Agent / Educator / Artist”. Hy sê hier ook: “People often ask me if I do not regret it that I do not practice fine art fulltime. My reply: ‘I do art all the time, but instead of using paint on canvas, my canvas is the human mind and my pigment human behavior.’”
Na hy in matriek die wenner van die Nasionale Wetenskap-Olimpiade van Suid-Afrika was, het hy ’n MA (cum laude) in Afrikaans en Nederlands en ‘n DTh-graad aan die Universiteit Stellenbosch verwerf. Na amper tien jaar in die bediening het hy homself gevestig as ’n strategie- en kommunikasiekundige waar hy geput het uit die kennisvelde van gedragsekonomie en skrywers soos Daniel Kahneman, BJ Fogg en Roberto Cialdini. Hy was oor die bestek van sy lewe dosent of gasdosent in ses verskillende dissiplines by tersiêre instellings: Afrikaans en Nederlandse literatuur, die literatuur van die Griekse Nuwe Testament, joernalistiek, beeldende kunste, grafiese ontwerp en besigheidsadministrasie en -bestuur.
My persoonlike ervaring van Bertie strek oor baie jare. My pa, wat professor in teologie was, was sy promotor en Bertie was sy sterstudent. Ek was toe nog op skool. Vele jare later het ons mekaar weer raakgeloop en hy het my ingetrek om die aanlynopleidinggedeelte van die Naspers Akademie te behartig. Dit was so ‘n wonderlike ervaring om nou met Bertie saam te werk – sy helderheid van visie, energie en toewyding was vir my ’n inspirasie.
Bertie was die afgelope jare ook by LitNet Akademies en LitNet betrokke, en het saam met Etienne van Heerden die LitNet-bestuurskomitee gevorm.
Kyk gerus na van Bertie se werk by die volgende skakels: Die Naspers Akademie as Chief Learning Officer, sy ouer webtuiste, waar daar inligting is oor vorige projekte, artikels as adviseur in Entrepreneur Magazine, sy bydrae by fin24.com, aanbieding oor “digital disruption and education” op YouTube; en besoek sy outeursbladsy op Amazon en besigtig van sy kunswerke aanlyn.
Ons het sowaar ’n groot gees verloor! En so skielik en voortydig, soos goed beskryf deur die sanger Jackson Browne toe hy ‘n vriend aan die dood afgestaan het: “He stopped his singing in the middle of his song.”
Bertie, jy word ongelooflik baie gemis.
Kosie de Villiers
Van links: Bertie du Plessis, Bharat Anand (Harvard-sakeskool), Felix Oberholzer (Harvard-sakeskool), Kosie de Villiers
The post In memoriam: Bertie du Plessis appeared first on LitNet.