Die dag na die rowers opgedaag het – leef hier en nou
Johan Pienaar
Lux Verbi
ISBN 9780796319272
Selfhelpboeke se ware toets is of dit jou gaan motiveer om jou lewe so in te rig en te verander dat dit meer vervullend gaan wees. Geestelike selfhelpboeke, daarenteen, moet jou inspireer om jou hart en gemoed sowel as jou denke te verander.
Johan Pienaar se boek Die dag na die rowers opgedaag het – leef hier en nou doen beide. Wat ‘n uitmuntende gids vir selfondersoek. Die skrywer lei jou na jou eie antwoorde en gee nie kitsoplossings vir die vrae wat hy so tergend stel nie. Vir hom gaan dit oor die diep en vervullende lewe waarna ons almal so smag en hoe ons dit kan bekom.
Pienaar en sy gesin is op 28 Julie 2014 deur gewapende rowers gevange gehou in ‘n rooftog wat hy as “boos en brutaal” (bl 14) beskryf. Voor die aanval het hy landwyd lesers deur sy blog aangespoor om verhale te vertel en hulle indrukke te deel oor hoe om meer in die huidige te lewe. Hy was besig om ‘n manuskrip saam te stel uit die bloginskrywings. Op die dag van die rooftog was die manuskrip reg vir versending aan die uitgewers, maar die rekenaar waarop dit gedeeltelik was, is ook gesteel. Met volharding het hy die meeste gemaak van wat hy wel gehad het en die manuskrip oorgeskryf.
Só ‘n groot ingryping laat mens stilstaan om te dink. Dit is juis die bestaansvrae wat hierna by mens opkom wat Pienaar takel, soos hoe om weer vir die lewe lief te word.
Sy grootste bate as skrywer is dat hy deur sy versteekte spitsvondigheid en bondigheid selfs die lewe se groot vrae maklik kan laat klink. Daar is ‘n bruisende geesdrif wat die teks dra en die leser wil laat opspring om die lewe te gaan aangryp. (Die groot aantal uitroeptekens dra ongelukkig, tot die teks se nadeel, hiertoe by.)
Sy groot klem is op hoe om ‘n betekenisvolle lewe te lei. Dit is ‘n praktiese gids wat vir vrae soos hierdie ‘n werkbare strategie bied. Geen wonder nie: Pienaar, vantevore gemeentepredikant en moderator in die NG Kerk, is ook ‘n opgeleide bestuurs- en verhoudingskonsultant en raadgewer vir verskeie direksies. Hy dink en skryf in terme van oplossings.
Vir ‘n betekenisvolle lewe gee hy aan die hand dat jy altyd ‘n nalatenskap van integriteit moet hê. Vele van sy strategieë om nuwe gewoontes aan te leer en ‘n nuwe denkstelsel aan te kweek, draai om Jesus as Saligmaker en die vryheid wat Hy as Saligmaker bied.
Dit is ‘n boeiende en helende boek wat ook werksmetodes vir alledaagse opknapping van jou lewenstyl en emosionele lewe gee soos dat indien jy ‘n instelling het dat oorvloed gedeel moet word, jy buitendien nie sal opgaar nie. Werk dus aan jou ingesteldheid op oorvloed!
Vir alledaagse geluk sal dit bydra as jy leer om nie uit te stel nie, laf kan wees en weet hoe belangrik dit is om mense behoorlik te groet met die aankoms- en die vertrekslag. Sy wye verwysingsveld oor populêre sielkunde, Afrikaanse digkuns sowel as erkende, geliefde skrywers van geestelike boeke, maak hierdie boek ‘n klein biblioteek van alledaagse en antieke wysheid. Michael Josephson, Totius, Audrey Blignault en Ralph Waldo Emerson word onder andere aangehaal.
| Lees ook: |
|---|
| • Nog boekresensies |
| • Lees 'n onderhoud tussen JB Roux en Marzanne Leroux-Van der Boon |
Vir ‘n skrywer van ‘n geestelike boek toon Pienaar ‘n uitermatige respek vir statistiek. Ná die lees van die boek weet ek nou dat daar in ‘n vyftigjarige se lewe 26 281 302 minute is en dat die brein 90 biljoen senuselle het.
Sy hoofuitgangspunt is dat Jesus ons glimlaggend beskou en dat die lewe ten spyte van so ‘n drastiese ingryping soos in sy eie lewe, nie ‘n somber affêre is nie. Hierdie standpunt illustreer hy goed in verhale en anekdotes soos oor die voorbereidingsdiens vir die Nagmaal. Swaarkry, bevestig hy, is nie ‘n straf nie.
Sy uiteindelike gevolgtrekking is: om sinvol te leef, verg toewyding, harde werk en doelbewuste keuses. Sterk aan te bevele.
The post Boekresensie: Die dag na die rowers opgedaag het deur Johan Pienaar appeared first on LitNet.