Moeder het altyd gesê dat ek nie ligsinnig moet wees nie.
Oupa het gewoon “spotter kry sy loon” as sy sinvolle bydrae tot die vermaning teen ondeurdagte praatjies voorgehou. En ek, wel, ek het beide geglo en die erns van die saak weg geglimlag ...
Daar is tans ongelooflik baie bewyse dat ons, hier en nou in 2015, in die laaste dae van hierdie wêreld lewe. Uiteraard soos ons dit ken. Die Skriftuurlike tekens is duidelik vir almal om te sien en na die lees van hierdie “oop-oë-ervaring”, mag selfs die spotters sukkel om teen die feite-oormag te argumenteer.
Dit is verseker so dat baie mense dwarsdeur die geskiedenis verkondig het dat juis húlle in die laaste dae leef. Dat die einde van die wêreld naby is. Selwers, het die uwe nog nooit soveel soos nou besef dat die tyd moontlik wel aangebreek het nie. Die gebeure wat in so baie verskillende plekke en met drukkende reëlmaat plaasvind, spreek meer as boekdele en skilder die toekoms in hoë-definisie.
Eerstens, daar is drie onbetwisbare tekens wat diep merke in die lewenshoutwerk kerf: ons mense se verliefdheid op hulself, hul geld en hul plesier.
Die liefde van die self of dan eerder Humanisme - die oortuiging dat die mens alles op sy eie kan bereik. Die Nasionale Party het die spoor so verloor. Die botterspaan-Proteas het die kerrielande in die Indiese Oseaan so onderskat en gedink opdaag is wen. Nou is hul liefde vir mekaar ook dun.
Die liefde vir geld of dan ook Materialisme. Die gode van geld en goeters. Elkeen wat ooit gedink het dat die nuusberigte oor verdwene en verskansde geld en oormatige wins uit vetgevulde tenders ’n nuutjie van die dag is; dink gerus weer. Die geldgatte van vandag het die handboek: “Van ’n Pennie tot ’n Pond” nie by hul kamerade in ontvangs geneem nie, maar dit wel uit die onderste laai van ’n lessenaar in die argiefkamer in Pleinstraat gehaal. Die omgee vir geld en baadjies en broekies vir maatjies en boeties, bestaan al van voor Oupa se dae af.
Die liefde vir plesier of ook genoem, Hedonisme. Daardie lewenstylbaba wat ná die suksesvolle fornikering tussen Humanisme en Materialisme gebore word. Wanneer ons agbare vorige mynwerkers mynbase met aandele word en rouvis van meisietjies se magies af eet. Wanneer die ingevoerde koringsap soos water vloei, terwyl die riool in die water val en geen sorgdraer daaroor neul nie.
Die tekens wat verband hou met die beloofde land, is moontlik die belangrikste van almal. ’n Profetiese klok as’t ware.
Daar word vertel dat ons baie van onsself kan leer indien ons na die Jodemense gaan kyk en wanneer die geprofeteerde gebeurtenisse by hulle voorkom; dat ons kan seker wees dat die ander geprofeteerde gebeure ook sal plaasvind. Maar, sonder om die korrektheid daarvan te verwater of te beswadder, vertel die geskiedenis van die mense binne en buite die beloofde land ’n verhaal wat egter meer treffend en uiteindelik diep onstelllend in nabetragting kan wees ...
“Jou vorste is in opstand teen My, hulle is kop in een mus met diewe. Hulle is almal versot op korrupsie en is agter omkoopgeskenke aan. Hulle laat nie reg geskied aan weeskinders nie, hulle behartig nie die regsake van weduwees nie.”
En dan ...
“Daarom gaan Ek nog ongehoorder dinge doen met hierdie volk: die een ongehoorde ding na die ander, sodat die wysheid van sy wyse manne sal verdwyn, die verstand van sy verstandige mense tot niet sal gaan.”(*)
Laat hulle wat oë het, sien...
- ’n Mater van my, wat baie slimmer as ek is en moontlik selfs die gemiddelde persoon in besonder, vertel van ’n langdurige gestoei wat hy met water het. Nie kraanwater nie.
Tussen 41% en 76% van Suid-Afrika se opgedamde water het te veel voedingstowwe in die water en dit veroorsaak ’n oormaat plantegroei en bakterieë; Poef!... Weg is die water.
- ’n Ander, nóg slimmer ou, beweer dat die land ’n bietjie meer as twee jaar oor het voordat ’n “regimekrisis” gaan ontstaan. Die uiteinde van dié krisis, is dat die regering die vermoë sal verloor om die land se begroting sélf op te stel; Poef!... Weg is die geld.
- Kragkrisis. In 1973 en 1979 was daar ook wêreldwye energiekrisisse. Nou het ons dit binne ons voordeur en die slim mense wat moet help om die probleem op te los, woon êrens in huisies by die see of in wit plakkerskampe buite Pretoria en die res werk in Kanada en Australië; Poef!... Af is die rekenaar.
- Net in 2015 is nagenoeg 'n miljoen mense deur die aardbewing in Nepal geraak en het geweld gelei tot die ontworteling van ongeveer 11,4 miljoen mense in Sirië, 1,91 miljoen in Suid-Soedan, 2 miljoen in Irak en 430 000 in die Sentraal-Afrikaanse Republiek. Meer as 10 000 mense het gesterf in die Ebola-uitbraak in Wes-Afrika, en minstens 1 500 is gedood in die Islamitiese oproer deur Boko Haram in Nigerië. In April 2015 het Suid-Afrika dade van xenofobiese geweld beleef wat die visie van 'n reënboognasie blou-oog gegee het. In hierdie tyd van dreigende geweld, oorlog en xenofobie staar die mensdom verskeie gevare in die gesig, veral in Afrika, waar probleme soos oorbevolking, werkloosheid, armoede, geweld en terrorisme simptome is van die algemene atmosfeer van krisis; Poef!... Weg is die Verenigde Nasies se hulp.
- En toe kom 19 September 2015... Poef!
Oupa was nie ‘n uitermate geleerde man of selfs een met noemenswaardige skolastiese prestasies nie, maar soms het hy insig gehad. Insig wat net hý sal weet waar dit gebore en grootgemaak is en insig, wat verskeie skoonseuns die hoenders in gemaak het. So sou Oupa halfpad deur die tweede helfte van die eerste of tweede wedstryd van die destydse Curriebeker-kompetisie opstaan, sy vaal teekoppie neem en kombuis toe stap terwyl hy handswaaiend na die televisie beduie en hardop met homself en wie ook al wou luister, sy voorspellings oor die span en hul toekoms deel.
Ek is nie seker of Oupa die wedstryd se uitsending uit Brighton gekyk het nie - moontlik was hy Saterdag daar, wie weet, maar, wat ek wel weet, is dat ek hom laat in die eerste helfte al kombuis toe kon sien stap het en daai woorde wat hom sou volg, sou ’n hele paar van ons die joos én die hoenders in gehad het: “Hulle sal in der ewigheid nooit weer die beker wen nie.”
Met al hierdie tekens in gedagte moet ons wys wees in ons bedinking en voorspelling van die eindtyd. Ons moet nie elke teken of insident as ’n duidelike rigtingwyser na die aanbreek van die laaste dae sien nie. Gelukkig het iedereen genoegsame toegang tot die enigste betroubare Bron, sodat ons ten alle tye voorbereid kan wees, wat sekerlik tog die eintlike doel van hierdie tekens is.
Laat hulle wat kán, dink.
*Uit die Bybel, Jesaja se woorde vandag; meer as 2700 jaar gelede.
The post Daar is doel in die tekens appeared first on LitNet.