“Die nuwe taalbeleid van die Suid-Afrikaanse Polisiediens in ’n streek soos die Noord-Kaap is nie volhoubaar nie en sal dienslewering benadeel,” sê Conrad Steenkamp, uitvoerende hoof van die Afrikaanse Taalraad (ATR). “Ons doen ’n beroep op die SAPD om die dispuut wat weens die beleid ontketen is, by wyse van gesprek en konsultasie op te los.”
Volgens ’n direktief van die Noord-Kaapse adjunk-provinsiale kommissaris, moet alle verklarings voortaan in Engels afgelê word en word polisielede verplig om verklarings wat in Afrikaans afgelê word self in Engels te vertaal.
Volgens Ria Olivier, ATR-programbestuurder, sal die beleid ’n wig tussen die gemeenskappe en die SAPD indryf. “Die polisie kan nie goeie diens aan die gemeenskap lewer as hulle nie die gemeenskap se taal gebruik nie. Die polisie se eie werk sal ook hieronder ly. Nie sommer enige tweetalige mens kan vertalings doen nie, en verklarings wat op hierdie manier afgeneem is, sal onbetroubaar wees en hofsake beduiwel.”
Volgens Steenkamp vorm die SAPD se skuif in die Noord-Kaap ongelukkig deel van ’n wyer patroon wat veel verder as Afrikaans strek. “Die verengelsing van die staat val onbewustelik terug op Britse koloniale idees oor taal en die beheer van onderdanige bevolkings. Wyle Neville Alexander het reeds in die 1990's gemaan dat meertaligheid ’n voorvereiste vir demokrasie in Suid-Afrika is.”
Die Taalraad hoop dus om binnekort met die Noord-Kaapse SAPD in gesprek te kan tree oor die nuwe taalbeleid.
The post Persvrystelling: Noord-Kaapse SAPD se taalbeleid onder skoot appeared first on LitNet.