LAPA se nuwe boeke vir September 2015

Aspoesterskoene

Kristel Loots

ISBN: 9780799376494

Sarah is vreeslik voorstedelik – al het sy ’n lyf wat skrik vir niks. Sy het nie werklik iets om oor te kla nie. Behalwe dat haar man in sy middeljaarkrisis is, hulle sekslewe beperk is tot high days en holidays, haar seun se tweede naam Moeilikheid is en dat dit soms vir haar voel asof net Hond haar verstaan.

Aspoesterskoene is ’n heruitgawe; bestaande storie, nuwe paar skoene!

Daar’s ’n Beer In My Boek

Emily Chichester Clark

ISBN: 9780799376067

Bertus is ’n groot bruin beer. Hy is moeg daarvoor om gewone beerdinge te doen. Hy wil ander dinge doen. Maar wát?

Dan ontdek hy op ’n dag ’n boek onder ’n boom. Binne-in is prente van ’n beer – net soos hy. Bertus kry ’n briljante plan ... hy gaan leer lees! Sy broers en susters dink hy is sommer laf. Bere lees tog nie boeke nie!

Maar Bertus vat die pad om die boek se eienaar op te spoor – en dit is die begin van ’n fantastiese avontuur ... Die perfekte prenteboek vir kinders wat pas die wonderwêreld van boeke en lees ontdek het!

Geheime Koninkryk 9: Droomvallei

Rosie Banks

ISBN: 9780799371109

Wanneer Bianka, Tamsin en Janie hoor dat die drake van Droomvallei opgehou het om hulle droomstof te maak, weet hulle dat koningin Gorina daaragter sit. Kan die meisies die drake help om weer droomstof te maak sodat hulle die towerspreuk kan verbreek en keer dat koning Kieliebaard in ’n padda verander?

Hoekom? Ensiklopedie

Saamgestel deur: Dorling Kindersley

ISBN: 9780799376173

Vertaler: Linda Roos

Hoekom kan jy nie jouself kielie nie? Hoekom bars vulkane uit? Wat is ’n eggo? Is daar lewe op Mars? Hoe werk ’n duikboot? Hoeveel sterre is daar?

Hierdie asemrowende volkleurensiklopedie word in ’n interaktiewe vraag-en-antwoordformaat aangebied wat feite vet pret maak! Dit fokus op onderwerpe waaroor kinders regtig graag meer wil leer en die vrae wat hulle daaroor vra – van die ruimte tot die aarde, die menslike liggaam en die natuur. Kom loer saam binne-in ’n vulkaan of verken ’n bewerdam met ongelooflike driedimensionele illustrasies wat verstommende detail blootlê. Verander jou kinders vandag nog in feitevrate met hierdie indrukwekkende naslaanbron!

Hoezit 5: Die Wonderwêreld van Voëls

Jaco Jacobs En Fanie Viljoen

ISBN: 9780799373950

Hoe kry party voëls dit reg om duisende kilometer te vlieg sonder om te verdwaal? Watter voël se oë is groter as sy brein? Hoe groot is die wêreld se kleinste voëlsoort?

Jy sal al die antwoorde in hierdie fantastiese feiteboek kry! Met 48 bladsye propvol prettige feite, volkleurfoto’s en hope aktiwiteite, speletjies en kopkrappers waarmee jy die wonderwêreld van voëls kan verken, is hierdie boek gewaarborg om jong diereliefhebbers se tone te laat omkrul van lekkerkry!

Hoezit! is ’n nuttige vriend in die klaskamer – en boonop vet pret. Die tydskrifformaat van Hoezit! het onlangs plek gemaak vir ’n interaktiewe webtuiste propvol inligting en vermaak. En die goeie nuus is dat LAPA nou Hoezit! in bekostigbare boekvorm uitgee – met splinternuwe temas en aktiwiteite wat perfek is vir skooltake en sal sorg vir ure se prettige vermaak by die huis.

Geheime Koninkryk 10: Leliemeer

Rosie Banks

ISBN: 9780799371116

Janie, Bianka en Tamsin het baie pret by Leliemeer saam met die waternimfe. Maar wanneer koningin Gorina en haar Stormkabouters ’n towerspreuk oor die Helderhoogte-waterval uitspreek, word hulle pret vinnig bederf. Sal die meisies dit regkry om die towerspreuk te verbreek en die towerwater te kry wat hulle vir koning Kieliebaard se wondermiddel nodig het?

Lem

Peet Venter

ISBN: 9780799376487

Hy is hardegat, bots met gesag en word uit die weermag ontslaan. Dan word hy ’n huursoldaat, raak betrokke by ’n staatsgreep wat skeefloop en beland in die tronk, maar hy het sensitiewe inligting weggesteek en dit kan baie ongemaklik wees vir die manne wat hom uitgelewer het.

Lemmer Bosman is ’n interessante karakter, want hy wil lojaal wees in ’n industrie waar mense hulle siele verkoop vir geld.

Lem is spannend, baie spannend.

Peet Venter het nou eers vir Thys Krige eenkant toe geskryf, maar Lemmer Bosman is ’n ewe sterk protagonis.

Middernagklub

Christien Neser

ISBN: 9780799373936

Witbaadjies.

Dít is hoe die prefekte by Gravitas bekend staan. En al het Elle en haar kamermaat, Refi, mekaar male sonder tal belowe dat hulle ’n veer voel om prefekte te word, het alles die laaste paar weke verander.

Om nié op die Lys van Dertig te kom nie, is nou vir elkeen ’n verskrikking. Dis soos om ’n rooi “L” op jou voorkop te laat tatoeëer. Van uitslip en reëls breek is daar die volgende maand geen sprake nie. Die volgende paar weke gaan Elle se lewe bestaan uit skoolwerk, orkes oefen en netjies in haar spore trap. Één misstap, één detensie of één simpel grappie kan die einde van jou drome beteken.

Daarom hou Elle en haar pelle plegtig hulle laaste middernagfees.

Maar waar Elle in die omtrek is, loop dinge gereeld skeef. En toe die Middernagklub op heterdaad betrap word, is dit die begin van nog ’n Gravitas-avontuur ...

Christien Neser se reeks tienerboeke oor die wel en wee van Elle Kroon is baie gewild, met selfs volwasse lesers wat nie kan wag om elke nuwe Elle-avontuur te verslind nie. Die sesde boek in die reeks beloof om net so skreeusnaaks, aweregse en romanties soos sy voorgangers te wees.

Prinses Nina en die Balletponie

Sarah Kilbride

ISBN: 9780799376203

Kom saam met prinses Nina op ’n betowerende avontuur op die rug van Trippel die balletponie.

Prinses Nina is versot op ponies. Maar Nina se ponies is nie sommer gewone ponies nie – hulle is towerponies, en wanneer prinses Nina op hulle ry, word sy weggevoer na allerlei betowerende avonture in ’n verre land ...

Een koue oggend besluit Nina om met Trippel te gaan ry. Hulle beland op ’n verhoog – en die balletkonsert gaan enige oomblik begin! Maar die sneeuvlokkies vir die konsert is op. Sal Nina betyds ’n plan kan maak om die konsert te red?

Die boek bevat ook ’n fantastiese papiermodel van Trippel die ponie waarmee kinders kan speel.