Resensie: Stories deur Julia Donaldson leer kinders om te lag

Genoeg kan dit nie beklemtoon word dat ’n boek vir ’n kind ’n toekomsbelegging is nie – ’n kind wat lees het in elk opsig ’n voorsprong. ’n Kind is nie te klein om ’n boek in die hand te hou nie. Inteendeel, hoe gouer ’n kind aan die wonder van ’n storie voorgestel word, hoe meer plesier wag daar vir so ’n kind.

Vandag het ek juis ’n arm vol boeke wat geskik is vir kinders vanaf vier jaar– stories wat die verbeelding prikkel, die kind leer om te lag vir wat plesier verskaf en stories wat die kind met woorde en ritmes bekoor. Lees die stories voor – meer as een keer – en laat die kind by jou sit as jy lees om die illustrasies te volg. Praat met die kind oor wat gelees word – maak storietyd iets om na uit te sien – oor die storie self, ja, maar ook vir die kosbare interaksie van ’n gedeelde plesier.

In Afrikaans is daar deesdae die beste kinderboeke van oor die hele wêreld beskikbaar. Wonderlike boeke wat met groot sorg pragtig uitgegee word. Vandag praat ons oor die reeks boeke deur die Skotse skrywer Julia Donaldson wat twee jaar gelede in Brittanje die erebenoeming Children’s Laureate ontvang het. Donaldson het verskeie blitsverkopers vir kinders geskryf wat wêreldwyd vertaal en gepubliseer is. Haar werk is geïllustreer deur Axel Scheffler, wat verskeie gesogte internasionale bekronings ontvang het. Sy illustrasies is in meer as dertig lande gepubliseer.

Ses titels, in Afrikaans vertaal deur Philip de Vos, het by Protea Boekhuis verskyn. Lekker humoristiese verhaaltjies, ideaal vir voorlees en selflees deur kinders vanaf ouderdom vier jaar. Die stories is ingestel om te vermaak, maar onderliggend is daar bepaalde waardes wat só ook aan die kind oorgedra word – van lojaliteit, vriendskap, omgee en meelewing. Nêrens is daar ’n swympie prekerigheid nie; inteendeel, dis juis wat so spesiaal is. Die storie word geniet, maar iewers word die saadjie gesaai wat die kind vroeg reeds deur voorbeeld leer om gevoelswaardes te ontdek en te koester.

Kortliks ’n voorstelling aan die ses Julia Donaldson-titels:

Zok is die storie van ’n ywerige drakie en ’n ongeluksvoël wat in bome vasvlieg en sy eie vlerke aan die brand steek. Gelukkig is daar altyd ’n gawe meisie wat hom help, maar die vraag is of sy hom sou kon help om óók ’n prinses te vang.
Tjokkie vertel van ’n vissie met ’n groot verbeelding. Hy is altyd vol stories oor hoekom hy laat vir die klas opdaag, maar wat sal gebeur as hy eendag régtig in die moeilikheid belang? Sal iemand hom dan nog glo?
Superwurm maak dat daar niks is waarvoor jy bang hoef te wees as Superwurm in die omtrek is nie. Hy kan sy lang lyf inspan om Gogga uit ’n put te red en Padda betyds uit ’n besige pad te gryp. Maar wie sal tot Superwurm se redding kom as Toornaar Akkedis hom ontvoer? Gelukkig voer Superwurm en sy insekvriendjies reeds iets in die mou.
Stokman vertel ons van ’n karakter wat saam met sy vroutjie en hul Stokkies in ’n familieboom bly. Maar op ’n dag word Stokman deur ’n hond weggedra. Stokman wil darem baie graag vir Kersfees saam met sy familie wees, maar dit lyk amper onmoontlik. Gelukkig kan Vader Krismis uithelp, en hy kry ’n perfekte geleentheid huis toe.
Rower Rot se hoofkarakter is nie ’n lekker kêrel nie. ’n Mens moet oppas vir Rower Rot. Hy steel jou kos ... en jou hart. Hy steel van ’n hasie se klawer tot sy eie perd se hawer. Maar altyd kom hy nie daarmee weg nie – eend sal hom ore aansit.
Kris de Kat vertel van ’n straatsangerskat. Hy en sy baas was onafskeidbaar saam om op ’n ou kitaar ’n liedjie te sing sodat mense ’n muntstukkie in sy bedelaarshoed kon plaas. Maar op ’n dag deur die noodlot heen verdwyn Kris de Kat. In al sy omswerwinge dink hy nét aan sy baas. ’n Pragtige boek oor vriendskap.

’n Spesiale kompliment aan Philip de Vos vir sy voortreflike en sensitiewe vertalings van hierdie pragtige prenteboeke, wat werklik ’n aanwins vir Afrikaans is.

Nog ’n heerlike boekie wat De Vos vertaal het, is die skreeusnaakse Die dag toe Louis deur ’n Grop gegryp is. Die Britse skrywer en illustreerder John Fardell het met hierdie boek twee gesogte kinderboektoekennings ontvang. Human & Rousseau is die uitgewer. Dis ’n lekker storie vol humor en afwagting – die dag toe Louis deur ’n Grop gegryp en ingesluk is, het sy suster Louisa geweet sy moet vinnig iets doen om hom weer daar uit te kry. Maar om ’n seuntjie uit ’n Grop se maag te kry is nie altyd so maklik nie, veral as daar ander vreemde gediertes soos ’n Grommelaar, ’n Gorrelama en ’n Growwerug Gasourus is wat ook lus is vir ’n happie.

Die dag toe Louis deur ’n Grop gegryp is, is ’n fantastiese boekie met ’n ondernemende dogtertjie as heldin.

Koop hierdie boeke vir die lekkerlees en weer lees – dis ’n aanwins vir elke kind.

Hierdie boekresensie is oorspronklik op Fine Music Radio uitgesaai.

Kollig op kinderboeke:

	'n Babalela vir Kersfees LitNet ATKV-Portaal
	Die laaste geveg deur CS Lewis Nina Swart Jeugresensies
	Die silwer stoel deur CS Lewis Marike van der Watt Resensies
	Spooksoene deur Troula Goosen Zoe Salzwedel Jeugresensies
	Lotta se lewe – my skilpad kruip uit sy dop deur Alice Pantermüller Suzanne Swart Jeugresensies
	KlasKamer Skolenuus op LitNet