Skerpskryf in Afrikaans

Meer as 100 leerders het vanjaar deelgeneem aan die vyfde Skerpskryf in Afrikaans-kompetisie vir graad 10-, 11- en 12-leerders van Drakenstein in die Boland.

Skerpskryf is ’n jaarlikse Afrikaanse skeppendeskryfwerk-kompetisie vir Afrikaanse leerders in Drakenstein en word aangebied deur die raad van trustees van die Hugenote Gedenkskool in Dal Josafat in samewerking met die Afrikaanse Taalmuseum en -monument (ATM) in die Paarl.

Piekniek op die gras na die werkwinkel oor skerpskryf

Die Hugenote Gedenkskool was in 1883 die eerste skool in Suid-Afrika waar kinders amptelik onderrig in Afrikaans ontvang het.

Volgens Janine Brown, opvoedkundige beampte van die ATM, is die doel van die kompetisie om leerders se kreatiwiteit te stimuleer deur storielyne rondom sekere temas te ontwikkel en te skryf.

“Die kompetisie is tot voordeel van elke leerder wat in Afrikaans skryf en help om belowende jong skrywers in Afrikaans te identifiseer.”

En aan kreatiwiteit was daar vanjaar geen gebrek nie.

Jerome Dumas en sy vrou Sabina wat albei Afrikaans gee by die New Orleans Sekondêre skool saam met twee van hulle leerders.

Leerders moes ’n gedig van tussen 10 en 30 reëls skryf oor hoe hulle Afrikaans praat of liefhet, of hoe hulle vriende of ouers dit praat, of net oor hoekom hulle van Afrikaans hou en wat hulle van Afrikaans dink. Oor die vorige vier jaar moes hulle onderskeidelik ’n nuusartikel, ’n rubriek, ’n nuusberig en ’n resensie skryf.

Die 30 finaliste en hulle onderwysers is genooi om by die prysoorhandiging by die Hugenote Gedenkskool deel te neem aan ’n gespreksessie, waarna daar lekker piekniek gehou is op die gras.

Dit was die tweede keer dat ek as beoordelaar en spreker by Skerpskryf in Afrikaans betrokke was. Die opgewondenheid wat daar jaarliks tydens die geleentheid oor Afrikaans is, beïndruk my elke keer opnuut.

Dantè Naude en Charl Eksteen

Nie net onder moedertaalsprekers van Afrikaans nie, maar ook by diegene wie se tweede taal Afrikaans is, heers daar ’n aansteeklike opgewondenheid oor die taal wat kleur en kultuurgrense oorskry. As dit is hoe die jongmense van vandag Afrikaans ervaar, hoef daar geen vrees te bestaan vir die toekoms van Afrikaans nie. Vanjaar se inskrywings het weer eens bewys daar is hope talent onder jongmense om die taal lewend te hou!

Die digter Gaireyah Fredericks het vanjaar as een van die beoordelaars en sprekers opgetree. As enkelouer van drie kinders moes sy harde bene kou voordat sy haar talent as digter kon uitleef. “Ek dig en skryf in drie tale,” sê sy: “Kaaps, Afrikaans en Engels.”

As iemand wat in Kaaps grootgeword het, het sy Standaardafrikaans, wat vir haar ’n vreemde en nuwe taal was, eers op ’n later stadium van haar lewe ontdek en onmiddellik ook dáárop verlief geraak, sê sy.

Jean Oosthuizen (joernalis), Francois Lötter (joernalis), Gireyah Fredricks (digter) en Janine Brown van die Afrikaanse Taalmuseum en -monument

Vanjaar se algehele wenner was Ayden Kruger (graad 11, Hoër Meisieskool Paarl). Railene Nel (graad 11, Hoër Meisieskool La Rochelle) het die prys vir taalgebruik gewen en Charl Eksteen (graad 10, Hoërskool Gimnasium) die prys vir kreatiwiteit. Danté Naude (graad 11, New Orleans Sekondêr) het eervolle vermelding ontvang.

Wenners sowel as hulle skole het lekker pryse gewen. Die algehele wenner het R1 000 kontant ontvang plus ’n koopbewys vir R1 000 vir ’n Afrikaanse boek. Die twee wenners in die kreatiewe en taalkunde-afdelings het elkeen R500 kontant plus ’n koopbewys vir R500 vir ’n Afrikaanse boek ontvang. Elkeen van die drie skole van die drie wenners ontvang ook ’n koopbewys van R1 000 vir Afrikaanse boeke. Die opvoeder of persoon wat die weninskrywing aangemoedig het, sowel as die onderwyser wat die meeste inskrywings instuur, het ook elkeen R500 gekry.