Uitslae: Sanlam WOW Spelfees

Die beste spellers in die land woon in die Wes- en Noord-Kaap. Met 19 uit die 30 wenners in die nasionale ronde van die Sanlam WOW Spelfees wat in Stellenbosch gehou is, het die Wes-Kaap 11 van die wenners opgelewer terwyl agt uit die Noord-Kaap kom.

Al drie wenners in graad 10 is uit die Wes-Kaap, terwyl die wenners in grade 1, 2, 8 en 9 almal Noord-Kapenaars is.

“Vanjaar se kompetisie was beslis ’n  hoogtepunt,” het ’n opgewonde Fiona van Kerwel, projekbestuurder vir die WOW-projek, gesê. “Dis die vierde jaar wat ons ’n nasionale kompetisie aangebied het en elke keer groei ons in getalle én in kwaliteit.”
 
Sowat 250 kinders van ongeveer 100 skole het Saterdag byeengekom om hul spel vermoëns te meet. Dit volg op ’n reeks uitdunne wat gedurende die jaar regoor die land aangebied is.

“Meer as 6 000 kinders het op skool-, kring-, distrik- en provinsiale vlak deelgeneem om ons vandag tot hier te bring,” het Saartjie Botha, direkteur van die US Woordfees (wat die WOW-projek insluit), tydens die prysuitdeling gesê.

Bri-Ann Cloete van Concordia (graad 9-wenner) wys haar staal.

Die leerders se uitsonderlike vermoë om reg te spel het die dag se program met sowat ’n uur oor die beplande tyd laat loop, omdat verskeie grade net nie tot ’n wenner kon kom nie. Die drie finaliste per graad uit elk van die nege provinsies het in rondes gespel. Sodra ’n fout begaan is, het die deelnemer uitgeval. Selfs die graad 2- en 3-leerders het byna drie uur aaneen gespel voordat ’n wenner aangewys kon word.

Frank Louw van die hoofborg, Sanlam, se afdeling vir Korporatiewe Sosiale Betrokkenheid het gesê hulle steun die projek omdat dit net nóg ’n manier is om Welvaartmeesters^TM te skep.

Wenners het elkeen ’n kontantprys en medalje van Sanlam ontvang, asook ’n boekprys van NB Uitgewers. Die eersteplek-wenners het ook elkeen ’n iPad gekry. Ander borge sluit in kykNET, die Dagbreek Trust en Het Jan Marais Nationale Fonds.

Die Sanlam WOW Spelkompetisie is nou in sy negende jaar. WOW, ’n akroniem vir Woorde Open Wêrelde, het ten doel om ’n liefde vir lees en woorde by leerders te kweek. Die projek help ook jaarliks sowat dertien behoeftige leerders aan die Universiteit Stellenbosch deur die beskikbaar stel van aanvullende beurse.

Die Sanlam WOW Spelfees vir 2016 het reeds geopen. Besoek gerus www.woordfees.co.za en klik op WOW.

Foto's: Sharief Jaffer/Woordfees

Graad 9-wenners saam met Frank Louw (Sanlam), Michelle Cooper (NB Uitgewers), Saartjie Botha (US Woordfees) en Karen Meiring (kykNET).

 

Nasionale wenners per graad

Graad 1
1. Jayden Botha Alpha Primêr – De Aar, Noord-Kaap
2. Wayde Scheffers Alpha Primêr – De Aar, Noord-Kaap
3. Stefan Stieger Gansbaai Laerskool – Gansbaai, Wes-Kaap

 

Graad 2
1. Kaylin Schmidt St Cyprians Primêr – Nababeep, Noord-Kaap
2. Stella Malan Jan van Riebeeck Laerskool – Kaapstad, Wes-Kaap
3. Dirk van der Berg Laerskool Fairland – Randburg, Gauteng

Graad 3

1. Jeane Scheepers Curro Heuwelkruin – Polokwane, Limpopo
2. Kelly-Ann Damon Saxonsea Primêr – Atlantis, Wes-Kaap
3. Rikus van Dyk Dirkie Uys Laerskool – Moorreesburg, Wes-Kaap

Graad 4
1. Alexa Viljoen Worcester-Noord Laerskool – Worcester, Wes-Kaap
2. Skyla Williams Springbok Primêr – Springbok, Noord-Kaap
3. Sonika Brits Laerskool Mooirivier – Potchefstroom, Noordwes

 

Graad 5

1. Megan Oosthuizen Laerskool Kragbron – eMalahleni, Mpumalanga
2. Ruben Maré Buffelsjagrivier Primêr – Buffelsjagrivier, Wes-Kaap
3. Mikail Kohler Menlopark Laerskool – Pretoria, Gauteng

Graad 6

1. Schalk Viljoen Laerskool Fairland – Randburg, Gauteng
2. Angela Schindehutle Stellenbosch Laerskool – Stellenbosch, Wes-Kaap
3. Dakeysha-Lee van Wyk Dr Izak van Niekerk – Springbok, Noord-Kaap

Graad 7

1. Marelle Putter George-Suid Laerskool – George, Wes-Kaap
2. Sigourney van Heerden Kleinzee Primêr – Kleinzee, Noord-Kaap
3. Martin Landman Laerskool Mooirivier – Potchefstroom, Noordwes

Graad 8
1. Jonathan Faro St Cyprians Primêr – Nababeep, Noord-Kaap
2. Bernice Meiring Hoërskool Louis Trichardt – Louis Trichardt, Limpopo
3. Saskia Bowman Helpmekaar Kollege – Johannesburg, Gauteng

Graad 9

1. Bri-Ann Cloete Hoërskool Concordia – Concordia, Noord-Kaap
2. Miché Nel Hoërskool Sentraal – Bloemfontein, Vrystaat
3. Zane Grobler HTS Middelburg – Middelburg, Mpumalanga

Graad 10
1.Jake van Dyk Bellville Hoërskool – Bellville, Wes-Kaap
2. Petru Pool Vredendal Hoërskool – Vredendal, Wes-Kaap
3. Matthys Carstens Durbanville Hoërskool  – Durbanville, Wes-Kaap

The post Uitslae: Sanlam WOW Spelfees appeared first on LitNet.