Winnie Rust (foto verskaf)
Winnie Rust
(1939–2016)
Die dood van die Wellingtonse skrywer Winnie Rust het die literêre gemeenskap in rou gedompel, sê Marga Stoffer, uitgewersbestuurder by NB-Uitgewers.
"Ons is geskok en verslae oor die moord op Winnie op Woensdag 11 Mei, en ons harte gaan uit na haar man, familie en die gemeenskap van Wellington waar sy so 'n groot rol gespeel het," sê Stoffer.
Die volgende boeke deur Rust het verskyn: haar debuut, Martha, gravin van Stamford (Hemel & See Boeke), wat in 2005 die kortlys vir die Jan Rabie-Rapportprys gehaal het; Margie van die seminary en ander verhale (2011), 'n kortverhaalbundel oor ses vroue wat hulle op die een of ander tyd op Wellington bevind het; en Trek (2012), 'n verhaal oor die verweefdheid van die bruin en die wit gemeenskap op Wellington. Laasgenoemde twee titels het by Human & Rousseau verskyn. Rust was ook 'n bekende kortverhaalskrywer.
"Sy het 'n groot liefde vir die geskiedenis - veral van die Wellington-omgewing - gehad, en dit op 'n baie spesiale manier as bronmateriaal gebruik," sê Stoffer. "Met haar dood verloor Suid-Afrika en die Afrikaanse letterkunde 'n unieke stem."
"Haar romans en verhale is gevul met fyn, genuanseerde sketse van veral die vroue wat deel was van haar geliefde Wellington se geskiedenis," sê Janita Holtzhausen, haar oudredakteur by Human & Rousseau.
"Haar menslikheid en stille wysheid is wat opgeval het in haar skeppende werk," sê Alida Potgieter, haar ouduitgewer by dieselfde uitgewer. "Winnie was ook altyd oop vir enige vrae en voorstelle wat ons gehad het, en was altyd bereid om verder te skaaf aan 'n teks as dit nodig was."
Holtzhausen en Potgieter onthou haar albei as 'n saggeaarde mens met deernis en respek vir mense, ongeag ras, stand of agtergrond.
Suzette Kotzé-Myburgh het deur die jare dikwels met Rust gewerk. "Onder ons skrywers is sy die grande dame van Wellington, nes Elsa Joubert van die Paarl is. Nou is hierdie fyn vrou met die pragtige blou oë en gemoduleerde stem weg, en ek wil my nie haar laaste oomblikke in daardie groot ou huis in Derdelaan indink nie," merk sy op.
Winnie Rust is op 14 April 1939 gebore en het meer as sestig jaar op Wellington gewoon. Deur die jare is haar verhale in populêre en literêre tydskrifte gepubliseer, en het sy bydraes vir tiener- en vrouedagboeke sowel as werke oor Wellington geskryf. Sedert 2000 het sy die rubriek "Post Scriptum" in die Paarl Post-gemeenskapskoerant behartig. Sy was altyd baie betrokke by lees- en poësiekringe en het ook van tyd tot tyd poësieprogramme vir die radio opgestel en boekbesprekings gehou.
Rust word oorleef deur haar man Manie, hul vier kinders en ses kleinkinders.
The post Winnie Rust se dood dompel literêre gemeenskap in rou appeared first on LitNet.