NB-Uitgewers het vir vyf kinderboekskrywers en een kinderboekvertaler gevra watter vyf boeke hulle vir die Kerskous sou aanbeveel en onderstaande aan LitNet voorgelê.
Hier is Constant van Graan, Elrien Scheepers, De Wet Hugo, Elizabeth Wasserman en Kobus Geldenhuys se voorstelle:
- Constant van Graan
Cecilia Steyn se Die vinnigste skoene in die hele wêreld is ideaal om die kleinspan hierdie vakansie aan die lees te kry. Die ouer kinders, veral dié wat hou van grilstories, sal behoorlik die skrik op die lyf gejaag word deur Neil Gaiman se Coraline. Sluit ook gerus ʼn klassieke kinderverhaal by hierdie jaar se Kerskous in, en hiervoor is The secret garden van Frances Hodgson Burnett ʼn goeie keuse, want daar is min stories met ʼn hoofkarakter so vurig en verstandig soos die 10-jarige Mary Lennox. Dan is daar natuurlik Troula Goosen, wat wys waarom sy die meester van Afrikaanse historiese jeugromans is met haar Raaisel-trilogie (begin by Raaiselklip). En as jou kroos reeds tieners is, sal die intriges van die 16-jarige Paul in Sindikaat (Annerle Barnard) hulle boei en vir ure van hul selfone laat vergeet.
- Elrien Scheepers
Uit soveel lekkerlees-jeugboeke kies ek vyf ouer boeke wat daardie “iets ekstra” het, wat tieners sal wegvoer, verras en vermaak – maar hulle ook sal bybly lank na hulle die laaste bladsy omgeblaai het.
Revolver deur Marcus Sedgwick
Die een wat my geboei het – ’n atmosferiese spanningsverhaal wat afspeel in 1910 in die Arktiese wildernis, oor die keuses wat ’n jong tienerseun moet maak na sy vader onverklaard op 'n ysveld sterf en ’n dreigende vreemdeling opdaag.
Blou is nie 'n kleur nie deur Carin Krahtz
Die een wat my ontroer het – ’n hedendaagse verhaal oor gesinsdrama, met ’n menslike en dapper hoofkarakter wat haar tienerseer met ’n humoristiese, unieke stem vertel en haar storie deel van jou hart maak.
Hoopvol deur Derick van der Walt
Die een wat my verras het – die aangrypende verhaal van twee besonderse tieners, elk met ’n soekende hart: een op reis na die vader wat hy nooit geken het nie; een wat verlang na iets meer as 'n troostelose lewe op 'n klein dorpie.
Sabriel deur Garth Nix
Die een wat my betower het – fassinerende fantasie met donker geheime, ware liefde en gevaarlike magte, met ’n lieflike hoofkarakter wat haar pad vreesloos volg, in ’n Middeleeuse wonderwêreld wat jou van jou eie probleme laat vergeet en jou vir meer sulke stories laat wens.
Warcross deur Marie Lu
Die een wat my inspireer het – aksiebelaaide wetenskapsfiksie met ’n kleurvolle hoofkarakter, ’n interessante toekomswêreld en ’n opwindende virtuele realiteitspel as tema.
Links, van bo tot onder: Kobus Geldenhuys (foto: Clifford Roberts), De Wet Hugo (foto verskaf), Constant van Graan (foto verskaf); Elizabeth Wasserman (foto: Brenda Veldtman), Elrien Scheepers (foto: Hanneri de Wet)
- De Wet Hugo
Kies-jou-avontuur 2: Die gevaarlikste boek op aarde deur De Wet Hugo. ? Hy beveel dus sy eie boek aan? Seker niks fout daarmee nie ...] Ek is baie lief vir sprokies en dink hierdie storie is heerlik vir seuns én meisies van alle ouderdomme.
Spel deur Annerle Barnard. Ek lees dit tans en dink dis een van die oorspronklikste Afrikaanse tienerboeke wat ek in 'n lang tyd gelees het. Dit sal 'n heerlike leeservaring vir tienerseuns wees!
Maanlig-meermin deur Troula Goosen. Hierdie storie het my bekendgestel aan 'n Suid-Afrikaanse legende wat ek glad nie geken het nie. Die vermenging van genres – misterie, fantasie, volksverhale, romanse ens – maak dit een van my gunstelingboeke vir jong lesers.
Kinders van die gode: Die geheim van die bloedsteen deur Antoinette Venter. Vol humor en lekker kinkels! Dis die perfekte leesboek vir almal wat hou van 'n lekker fantasieverhaal vol verrassings.
The Bernadette Watts Collection. Tydens my kleuterjare het Tafelberg vertalings deur Linda Rode van Bernadette Watts se prenteboeke uitgegee. Ek het 'n paar besit en die illustrasies het my weggevoer na 'n wêreld waar ek met my hele hart wou gaan bly! Toe ek onlangs al haar prenteboeke in een dik bundel ontdek, het ek dit dadelik bestel.
- Elizabeth Wasserman
Ontsluit ’n groter wêreld vir die kinders in jou lewe met ’n boek vol kennis, pret en avontuur. Hierdie boeke is geskik vir kinders tussen ses en twaalf jaar, en kan met die hele gesin gedeel word. Hou hulle aan die lees met een boek, of selfs twee.
Waar kom ons vandaan? deur Andreas en Schalk Engelbrecht
Hierdie boek is ’n reis deur die tyd en beskryf die pad wat ons geloop het van die ontstaan van die mensdom tot vandag. ’n Moet-lees vir die slim kind.
Raak handig met klippe en minerale! en Raak handig met fossiele! deur Alix Wood, vertaal deur Elizabeth Wasserman
Hierdie boeke verduidelik stap vir stap hoe geoloë en paleontoloë te werk gaan om die geheime van die aarde en oergediertes te ontsluit. Dit wys ook hoe om jou eie klipversameling te bou en self ’n fossieljagter te word.
Hoekom nie? deur Crispin Boyer, vertaal deur Elizabeth Wasserman
’n Lekker vet boek vol feite en foto’s van allerhande interessante antwoorde op al daardie vrae wat nuuskiere agies gedurig vra.
Die boosaardige broers Botha en Die skandalige susters Smit deur Adeline Radlof en Alex van Houwelingen
Twee kleurvol-geïllustreerde maltrap-avonture vir seuns en dogters.
Die avonture van Speurhond Willem deur Elizabeth Wasserman, illustrasies deur Chris Venter
Reis saam met die wonderbaarlike speurhond na vreemde lande, en selfs die ruimte! Die eerste ses avonture is nou in twee omnibusse saamgevat. Ure se pret vir voorlees en selflees.
- Kobus Geldenhuys
Vir die kleintjies:
My gunsteling-dierestories / My gunsteling-slaaptydstories
Bekende en geliefde sprokies soos “Rooikappie” en “Die lelike eendjie” in speelse rym oorvertel, met pragtige volbladillustrasies. Dit sal ouers en versorgers ook groot vreugde verskaf om die sprokies in hierdie vorm vir kleintjies voor te lees.
Die seerowers en die grot vol goud
’n Heerlike aksieverhaal oor ’n seerowerseun, Basjan, se avonture saam met sy ouers, sy beste maat, Matilda, en sy brakkie Bene. Prettige illustrasies en propvol vreemde karakters, in hierdie geval onder andere drie hekse. Dis die tweede boek in die reeks, in maklik leesbare taal wat toeganklik vir eerste lesers is.
Hondman op hol
Die tweede boek in hierdie reeks volkleurstokiesprente is net so propvol avontuur en kinkels as die eerste een. Hondman kry hond se gedagte dat sy aartsvyand, Ramkat, weer aan die konkel is en bewys soos altyd dat hy superbrak is. Hierdie pittige boek is in kleur geïllustreer en sal oud en jonk laat glimlag.
Speurder Kwaaikofski, die boeliebom
Die gewilde baasspeurder is terug, en hierdie keer ondersoek hy ’n saak in sy eie klas. Hy maak soos gewoonlik ’n slim plan om die skuldiges aan die pen te laat ry, en dit alles terwyl hy aan sy geliefkoosde kougom kou. Nog ’n wenner onder beginnerlesers.
Die stoutste klas op aarde
’n Nuwe reeks wat laerskoolleerders baie sal geniet. Die 4B’s is ’n onhebbelike spulletjie en hulle skoolhoof, mevrou Brombom-Bredeboud, het nie ooghare vir hulle nie. Die kinders steur hulle nie aan haar nie; hulle is te besig om te kyk wie die Koekiekonings gaan wees en die Wys-en-vertel gaan wen. ’n Grappige en maklik leesbare boek!
The post Boeke vir die Kerskous: Vyf boeke, vyf skrywers appeared first on LitNet.